2Sa 10 | ZomZIV | STEP | Hih hun khit ciangin, Ammon-te kumpipa si-a a tapa Hanun in a kumpi za a luah hi.

2 Samuel 10

David in Ammon-te Zo

1 Hih hun khit ciangin, Ammon-te kumpipa si-a a tapa Hanun in a kumpi za a luah hi. 2 David in, “A pa in kei tungah migitna hong lah bang tektekin Nahash tapa Hanun tungah migitna ka lak ding hi,” ci-in a ngaihsun hi. Tua ciangin David in Hanun tungah a pa tawh kisai a dahpihna lak dingin tangmite a paisak hi. ^a

Ammon-te gam ah David mite a tun uh ciangin 3 Ammon’ uliante in a topa uh Hanun kiangah, “David in na pa a zahtakna-in na kiangah dahpihna lak dingin mite hong paisakin um na hi hiam? David in khuapi sung encianin thu kansima a lumlet dingin a sawl hi lo ahi hiam?” a ci uh hi. 4 Tua ciangin Hanun in David mite mana, a khamul uh a lang metsakin a puantual uh a tawbo tung ciangah attansakin a ciahsak hi.

5 David kiangah hih thu a kikoh ciangin, amaute maizum lua uh ahi manin amah in tua mite tawh kimu dingin kamtaite a sawl hi. Kumpipa in, “Na khamul uh a sau mateng Jericho ah om unla a sau ciangin hong ciah un,” a ci hi.

6 Ammon-te in David a hehsak lam uh a kitheih uh ciangin Beth Rehob le Zobah a Aram-te khe galkap tul sawmnih le kumpi Maacah mi tul khat tawh, le Tob panin mi tul sawm le nih zong a cial uh hi. ^b

7 Hih thu David in a zak ciangin a galsim mi khempeuh tawh Joab a kuansak hi. 8 Ammon-te paikhia uh a khuapi kongpi lutna ah galdo dingin a kigual uh hi; tua laitakin Zobah, Rehob a Aram-te le Tob le Maacah a mite gam sungah a tuam om ciat uh hi.

9 Joab in a nung le a mai-ah galte in a pan lam a mu hi; tuateh Israel sungah a galsiampen pawl tengkhia a, Aram-te do dingin a kigualsak hi. 10 A mite a om lai teng a sanggampa Abishai uksak a, Ammon-te langah a kigualsak hi. 11 Joab in, “Kei lamah Aram-te a hat luat leh kei hong huh dingin nong pai ding uh hi; no lamah Ammon-te a hat luat uh leh kei hong pai-in nang kong hu ding hi. 12 Kihatsak unla i mite le eite Pasian khuapite adingin hangtakin do ni. TOPA in ama mita hoih a sak bangin hong sem ding hi,” a ci hi. ^c

13 Tua ciangin Aram-te sim dingin Joab le amah tawh a pangkhawm galkapte kuan uh a, ama mai-ah amaute a tai uh hi. 14 Aram-te a tai uh Ammon-te in a muh uh ciangin Abishai mai-ah amaute tai uh a, khuapi sung a tuh uh hi. Tua ciangin Ammon-te a simna panin Jerusalem ah Joab a ciah hi.

15 Israel-te in amau a delhkek lam a muh uh ciangin a kikaikhawm kik uh hi. 16 Hadadezer in Gun ^{▼▼10.16 Tua in Euphrates} gal panin Aram-te kuanpih a; amaute Helam ah Hadadezer’ galkap mangpa Shobach in a makaih hi.

17 Hih thu David kiangah a kigen ciangin amah in Israel khempeuh khawmin Jordan gal kah uh a, Helam ah a pai uh hi. David maituah-a do dingin Aram-te kigual in a do uh hi. 18 Ahi hangin amaute Israel mai-ah tai uh a, David in a sakolleng hawlte uh za sagih le a khe galkapte ^{▼▼10.18 Septuagint khutgelh pawlkhat (1Kh. 19:18 zong en in); Hebrew ah sakol tuangte} uh tul sawmli a that hi. Amah in a galkap mangpa uh Shobach zong sattuk a tua lai-ah a si hi. 19 Hadadezer khut nuai-a om kumpite khempeuh in, Israel in amaute a zawh lam a theih uh ciangin Israel-te tawh kilemna bawl uh a, amau nasem a suak uh hi. ^f

Tua ciangin Ammon-te a huh lai ding uh Aram-te lau ta uh hi.